【明報專訊】曾經派駐英國嘅日本駐港總領事三浦潤去年底上任，噚日佢喺日本天皇誕辰慶祝酒會初試啼聲，以一口流利英語致辭。到賀嘅財政司副司長黃偉綸致辭時就話，舊年已聽聞日本有個「好似電影演員、講得一口完美英文嘅外交官嚟香港」，傳聞的確係真，又讚對方做得好。現場有外交官笑言，三浦嘅英語水平係字正腔圓嘅「女王英語」（Queen's English）。
曾借調防衛省負責國際交流嘅三浦話，香港係日本重要嘅經濟同人文交流伙伴，上任後有機會親身來港，相信香港只要保持獨特，繼續可以做東方之珠。佢話期待香港對日本水產入境限制盡快取消，港人可以食到安全嘅日本海鮮。酒會都有福島等十幾個縣市特產畀嘉賓享用，連鎮痛貼都有。黃偉綸就有技巧咁話，雙方雖然可能有分歧，但相信會喺共贏、合作嘅精神下，推進雙方共同利益。
林鄭「無眼鏡look」示人
解釋做咗矯視手術
Emily喺酒會見到前特首林鄭月娥，發現佢個樣有啲唔同咗，原來係無戴眼鏡。Emily聽聞林太近排都係以「無眼鏡look」示人，佢同人解釋係做咗矯視手術。