【明報專訊】人人都想發新年財,唔少人買六合彩博發達,不過噚日就有人誤以為自己中咗六合彩,去領獎先知好夢成空。事緣噚日朝早11點幾,一名姓洪嘅29歲男子去跑馬地賽馬會總部,聲稱中咗六合彩新春金多寶頭獎,要領取獎金,但職員核對佢嘅彩票後發現無中獎,男子唔肯走,搞到職員要報警。
被勸退後折返 警員兩度到場
警員接報到場調解後,洪姓男子雖然一度離開,但警員離場後,佢無幾耐又折返,仲喺大堂擾攘,職員唯有再次報警,最後由警員勸退,警方將案件列作「誤會」。馬會公關同Emily確認事件,話職員核對嗰個男子嘅彩票,話佢知無中獎,之後佢仍然唔肯走,只好報警。
星期日晚開彩嘅六合彩新春金多寶,係六合彩頭獎史上最高嘅派彩紀錄,之前Emily都報道過,「獨食」1.93億元彩金嘅頭獎幸運兒係親身去投注站用現金,以10元買咗一注就「一擊即中」;而二獎有12注中,每注派121.5萬元;三獎就有536.5注中,每注派7.25萬元。
呢單新聞噚日都引起唔少人談論,有人講笑話會唔會係對錯咗上一期攪珠結果,又有人聯想到《97家有囍事》周星馳被兩個阿哥整蠱以為中咗六合彩嘅情節。