【明報專訊】多個外國駐港領事都透過社交網站同市民拜年,又慶祝蛇年。澳洲總領事韋嘉鋒(Gareth Williams)去咗嘉道理農場暨植物園了解「野生蛇類拯救計劃」,仲親手拎蛇上手(圖一)。Gareth話,澳洲原住民傳統文化入面,彩虹蛇係創造者同水嘅守護者,中國文化嘅蛇就象徵智慧同財富,佢又推介農場有關蛇嘅保育展覽,展期到今年3月。
美國總領事梅儒瑞(Greg May)同法國總領事杜麗緹(Christile Drulhe)就分別展示日益流暢嘅廣東話。Christile帶蛇形包點甜品去小學探訪,用廣東話同學生交流點過新年。Greg就化身「蛇王」喺領事館「捉」小朋友扮嘅「蛇仔」,不過佢捉蛇唔使用網嘅,用利市就「收服」幾條蛇仔。
巴基斯坦總領事謝赫(Riaz Ahmed Shaikh)就話,希望新年可激發大家珍惜傳統、迎接新開始,慶祝香港嘅種族多元。以色列總領事藍天銘(Amir Lati)就去上環文武廟,先用廣東話講「恭喜發財」,又用流利普通話祝市民「新年快樂、萬事如意、年年有餘、恭喜發財」。
相關字詞﹕蛇年 韋嘉鋒 Gareth Williams 外國領事