港聞

港聞二

【Emily】社企義剪 基層童變髮初體驗

【明報專訊】過年前最啱飛個髮,由香港中華基督教青年會(YMCA)營運嘅社企單剪店YM HAIR,早排為30個嚟自基層家庭嘅小學生義剪,好多小朋友仲係第一次體驗由髮型師剪髮,包括三年班嘅兆珩。兆珩本身好驚電刨聲,髮型師特意用鉸剪幫佢慢慢剪,等佢可以放鬆。

YMCA義剪主要由熱心企業同個人捐款支持,除咗幫助有需要嘅人,仲為青年提供實踐同學習機會。Ted係第一班YM HAIR資助受訓嘅青年,經歷長時間培訓同實習,𠵱家已經可獨當一面工作。佢話平時好少幫小朋友剪髮,今次可以幫小朋友實現心中理想髮型,感到好滿足。二年班嘅柏霖話幫佢剪髮嘅Ted哥哥好細心,有聆聽同尊重佢要求,認為新髮型「100分,好滿意」。

YMCA青少年外展服務督導岑慧儀話,有八成曾喺YM HAIR工作嘅青年係雙待(待業同待學)青年,缺乏足夠職業技能同社會支持。佢話剪髮可以同人交流、建立信任、提升自信心,期望受訓青年有能力自行營運單剪店,成為年輕創業家,或投身自由市場就業。

相關字詞﹕

上 / 下一篇新聞