港聞

港聞二

【Emily】律師會《法律是咁的》第二季初五開播

【明報專訊】臨近蛇年大家準備收爐,但律師會就已展望緊過年後幾個大製作。律師會喺傳媒午宴上預告,同港台合作製作介紹普通法嘅節目《法律是咁的》會「添食」播第二季,前律政司長梁愛詩喺預告中話入行做律師係因為「年少無知」,詳情就要留意節目。會長湯文龍(Roden)仲透露,下個月會舉辦運動法主題嘅活動,已請到國家隊金牌運動員出席。

《法律是咁的》第一季節目喺港台一台播出,助理廣播處長李慶華話新一輯會同時喺港台電視31同港台網站播出,涵蓋家事法、物權法、刑事法、知識產權等,大年初五首播。Roden話淨係律師、法官講守法係無用嘅,守法需要市民遵守法律先得。根據預告片,律師會前會長王桂壎、熊運信,房委會資助房屋小組委員會主席黃碧如等都會受訪。

運動法活動邀得兩奧運金牌得主

律師會下個月下旬會舉辦運動法主題嘅活動,包括體育法論壇同粵港澳律師運動會。Roden透露已有兩個巴黎奧運金牌得主會出席22號嘅開幕禮,被問係唔係入讀教大嘅韻律泳運動員王柳懿同王芊懿,佢就叫大家估吓,暫時唔開估住。退役嘅劍擊金牌運動員、仲讀緊法律課程嘅江旻憓就擔任體育法論壇其中一名講者。

相關字詞﹕

上 / 下一篇新聞