港聞

港聞二

【Emily】愛嬰港怡教袋鼠式護理 早產媽媽話BB有進步

【明報專訊】母乳餵哺對嬰兒健康有莫大裨益。推行多項母乳餵哺友善措施嘅港怡醫院,2018年開始參加認證計劃,舊年9月正式獲定名「愛嬰醫院」,成為全港現時唯一獲定名嘅私家醫院。前年喺港怡分娩嘅媽媽出院時嘅母乳餵哺率超過90%,顯示醫院大多數媽媽願意同有信心餵母乳。

港怡有多項措拖支援媽媽餵母乳,包括設有由國際認證泌乳顧問主理嘅母乳餵哺診所等。媽媽Janet舊年8月喺港怡緊急剖腹,當時男嬰未足月,較預產期早6星期出生,被送到初生嬰兒深切治療部,後嚟轉送育嬰室接受監察。約兩星期後佢先可以首次「埋身」餵母乳。

仔仔住院廿幾日期間,Janet每日去醫院,要泵奶6至8次,又試過乳腺阻塞,靠護士幫佢按摩乳房疏通乳腺。佢又由醫護得知袋鼠式護理嘅肌膚接觸方法(即係父母用衣服或醫院袍包住只著尿片嘅BB,畀BB躺在懷裏),對早產BB健康同腦部發展有益,於是每朝8點半去醫院做3個鐘袋鼠式護理,約兩星期後仔仔情况有明顯進步,體重每日增加幾百克。

相關字詞﹕

上 / 下一篇新聞