【明報專訊】政府成立嘅「發展旅遊熱點工作組」預期今年上半年制定推進項目,民建聯同工聯會先後見過工作組組長、副政務司長卓永興,噚日就同一時間喺立法會開記者會發表意見,真係約都無咁啱。民建聯繼續提議政府推動熊貓經濟,新界東南議員李世榮就提出喺西貢增設特別打卡路牌,更以近年內地網絡流行嘅「我在××很想你」為例,建議整一個「我在西貢很想你」路牌。
港島西議員陳學峰就話,中西區有不同宗教文化,有中式廟宇亦有西式教堂,大都有過百年歷史,配合埋區內傳統小食,就可以連成一條「一路睇一路食」嘅旅遊路線;佢又建議打造「主題街市」,好似香港仔街市以海鮮為特色,可配合樓上熟食中心「即買即煮」。
至於工聯會嘅採訪通知原本係早上11點,後來改為11點半,同民建聯撞到正。工聯會嘅建議有三大方向,包括加強18區特色景點嘅宣傳配套、串連獨有文化路線同培養導賞人才,其中都有建議串連香港嘅主要寺廟、教堂、清真寺等宗教建築,畀遊客了解香港嘅宗教文化,同埋宗教和平共處嘅精神,亦可以設愛國主義、西式建築、傳統建築等主題旅程。