【明報專訊】全港15個農曆年宵市場噚日開鑼,將一連7日開放至年初一(29日)清晨。Emily噚日去咗維園花市,喺培僑書院嘅攤檔見到校監、立法會前主席曾鈺成。佢話每年都會專程嚟捧場,仲買咗兩隻蛇公仔,盛惠168元,佢仲話今年花市「都幾旺場」。
曾鈺成同Emily講,過去一年經濟唔係好理想,新一年希望經濟繁榮,居民生活安定。至於有咩方法應對財赤,佢話「(政府)淨係簡單諗點樣去節省開支等等,恐怕都解決唔到個問題」,需要當局同社會各界一齊努力。佢又話自己已退休,「最多都係多啲消費㗎啫」。
今年亦有政黨投得維園年宵攤檔,其中工聯會就準備咗卡通揮春、利市封、開運牌等賀年物品義賣籌款,亦安排咗書法老師即席揮毫寫揮春。立法會議員(九龍東)鄧家彪噚日去撐場,開咪話雖然香港失業率偏低,但經濟就唔係好暢旺,祝願全港打工仔女喺嚟緊蛇年齊齊加薪升職。