【明報專訊】臨近歲晚，再多一間老字號食肆結業。近日有傳喺香港有77年歷史嘅中環羅富記粥麵專家將會結業，Emily噚日致電德輔道中分店，獲店員證實將喺聽日全線結業，未知確實收舖時間。店員話，如果想食招牌菜鯪魚球，最好今日就去幫襯。
街坊緬懷「加料」粥 讚店員有禮
現時羅富記有兩間分店，分別喺德輔道中同擺花街。網上流傳結業係因為東主移民，店員噚日就話老闆退休，但係咪移民就未知。消息傳出後，唔少食客喺社交平台大嘆可惜，「又少咗個飯堂」。有街坊回憶每次去到嗌粥食，師傅都會靜雞雞幫佢「加料」，塞多啲餸喺粥底；又有人讚羅富記嘅店員好有禮貌，就算午市幾忙都唔會黑口黑面。
羅富記品牌自1920年代由中山人羅家富創立，到1948年後人羅焯林來港創業，將羅富記同家鄉名物炸鯪魚球一併帶嚟香港，𠵱家已經承傳咗兩代。
羅富記曾經有塊超過50年歷史嘅「鯪魚形」藍底紅字霓虹招牌，到2010年政府規管舊招牌，鯪魚招牌屬大型僭建物需要清拆，𠵱家收藏喺M+博物館。日後想懷緬過去，睇怕只能去M+。