港聞

港聞二

【Emily】政府檢討本地生定義 尚海龍:貿然改變礙高才來港意欲

【明報專訊】「考試移民」問題惹起爭議,政府正檢討大學聯招「本地生」定義,教育局長蔡若蓮日前透露考慮申請人報讀大學前幾年是否居港。高才通人才服務協會會長、立法會選委界別議員尚海龍認為現行政策清晰,唔應該針對新來港人才改動,並指多數人才係因為教育制度來港,貿然改變會影響佢哋來港意欲。

尚海龍噚日與傳媒茶敘,提到教育局就本地學額問題「放風」後,一晚之間收到過千留言同信息表達關注。佢質疑當局如何判斷學生是否居港,舉例唔少港人帶同子女移居海外,反問佢哋係咪「本地生」。佢又話高才來港主要希望子女能接受本港教育,改變機制會影響佢哋來港意欲及對政府嘅信任。佢強調唔反對政府優化計劃,但促請當局聽取多方意見。

將軍澳多高才住 與當區議員合作

今次茶敘由西貢區議員張美雄負責邀請傳媒,並同尚海龍一齊出席。佢哋解釋之前喺活動認識,張美雄話唔少高才住喺將軍澳,佢希望同尚海龍多合作,例如喺區內搞廣東話正音班。上屆立法會選舉張美雄為另一議員林素蔚助選,被問到年底參選意向同部署,尚海龍同張美雄就三緘其口,話言之尚早。

相關字詞﹕

上 / 下一篇新聞