港聞

港聞二

【Emily】受訪恒大 麥玲玲:港起碼3年才脫困

【明報專訊】蛇年將至,恒生大學傳播學院搵咗幫人睇風水嘅麥玲玲批批香港運程,麥玲玲唔止以運勢角度分析,仲好似時事評論員咁大談國際關係,話預期香港蛇年唔會太平穩,因為「國際關係緊張,好多不同事情會出現,的確唔係好平穩,我們起碼要等3年才能走出這個困局」。

麥玲玲話,凡事有循環,運勢一樣。佢話2025年係農曆乙巳年,60年前嘅乙巳年,即係1965年,以及緊隨嘅丙午、丁未年,即1966、1967年,當時社會狀况非常不穩,而根據古書《丙丁龜鑑》記載,丙午、丁未叫「赤馬紅羊」,係代表「火旺」年份,所以佢預期香港蛇年都唔會太平穩。

囑大家蛇年儲能量勿冒進

麥玲玲以蛇論蛇,形容蛇有半年要冬眠,所以奉勸大家儲存能量,唔好冒進喎,「蛇有蛻皮嘅特性,我們要蛻變,睇住環境轉變,順應大勢,我覺得都唔會太差,守一守吧」。

風水命理嘅嘢,唔信者會認為篤信風水係迷信。咁前景唔明朗,玄學家又可唔可以幫人改運?麥玲玲話命運係好複雜嘅,以杯入面嘅水比喻,指杯嘅大小係定局,風水師角色只能夠幫人倒滿水,唔可以幫你換一隻杯,仲講笑話如果可以換嘅話,佢自己一早換咗,「我何須坐喺呢度說話,又要到處去講學?」

相關字詞﹕

上 / 下一篇新聞