【明報專訊】文體旅局長羅淑佩近年官運亨通,佢噚日出席商台65周年午宴時,被陳志雲等主持問到升官心得同最敬重嘅上司係邊位。佢最初笑笑口話啲問題「伏」,但亦分享咗一段往事,就係佢2014年做旅遊事務副專員時要上立法會帳委會,「盛事基金出咗少少事……咁當年嘅常任秘書長係畀到好大嘅鼓勵我,話你𠵱家係好難面對,不過你面對咗之後,將來你就會覺得好輕省㗎喇!」佢講嘅嗰位上司就係時任商經局常秘黃灝玄。
羅淑佩話,其實佢做局長之後,有傳媒講起佢兩年做咗3個位,咁佢先醒起自己連做3個位。至於升官快秘訣係咩?「咁認真答你係,你做嘢唔好諗升職,唔好為升職而做嘢,淨係想做好你自己嘅崗位、同認為係啱嘅嗰件事。」
講到呢度,陳志雲話:「即係曾蔭權嗰句口號:我要做好呢份工!」羅淑佩就話:「我呢份唔係工嚟!我呢份係一個使命嚟㗎!」陳志雲隨即話「所以呢,你係『高過』曾蔭權」。
細個叫「奀女」 羅:我係瘦底
陳志雲問到佢細個叫「奀女」嘅原因,羅淑佩話其實佢係「瘦底」,「但𠵱家通香港都話我肥」;佢提到呢排唔少市民搵佢打卡時都話「局長原來你咁瘦」。
相關字詞﹕羅淑佩