【明報專訊】一向喺網上月旦時政嘅工聯會立法會議員陳穎欣,早前點名質疑協助畀人「賣豬仔」港人家屬嘅前公民黨區議員余德寶「鋪排出來選」,引起余公開反駁絕無其事。事件燃燒幾日後,陳穎欣喺自己YouTube頻道再指有人「挑動對保安局仇恨」,又話自己都有跟進過相似嘅案件,「都係先低調跟進,解困後涉事人來到我辦事處送錦旗,我至將有關情况公開」。而保安局長鄧炳強噚日則不點名多謝余心理協助家屬。
睇番陳穎欣舊年2月facebook帖文話,收到市民話兒子去老撾公幹後失去聯絡,經外交部駐港公署協助下,當事人過年前平安回港。
話得自己同李梓敬網上發聲
故被重點招呼
陳穎欣喺最新片段批評「黃人黃媒」借事件攻擊建制,話跨境騙案涉及外交層面,「講到現任議員同官員唔做嘢,講到好似得余德寶做嘢」。佢片中多次點名引述報章專欄,話有人「斷章取義」講佢話余德寶參選,而其實佢有講其他內容,例如話余「變臉」向中央求救,但佢最新片段就無進一步多講余德寶否認參選。
陳穎欣又引述收到朋友話自己今次好似「被招呼」,但佢話𠵱家得番自己同新民黨李梓敬網上發聲,所以就會畀人重點招呼。