港聞

港聞二

【Emily】狄志遠年度工作報告 記拆遷戶殘疾人困境

【明報專訊】今屆立法會任期踏入最後一年,唔少議員推出年度工作報告總結議會工作。新思維狄志遠嘅報告講工作之餘,訪問咗8名基層同弱勢社群,包括被拆遷嘅長者、劏房戶、殘疾人士等,講番各自困境。阿狄話希望社會除咗重視經濟,都要關心基層處境。

用AI整配圖幾可亂真

阿狄嘅工作報告以黑白色為主調,唔少彩色相片都變咗黑白。佢並以AI製作配圖(圖,報告黑白圖片),相片逼真,如果唔係有備註標明,Emily都差啲以為係真實相片。

工作報告訪問咗8名阿狄協助過嘅市民,一名住喺40呎劏房嘅77歲伯伯認為,政府有資源解決房屋問題,不過好多土地空置多年,房屋興建緩慢;另一名居於洪水橋嘅七旬長者受收地影響,政府一直未清楚交代賠償同安置方案,話「有得住有得食」係最基本嘅期望,希望有生之年有個安穩家園。

一名阿狄嘅助理係殘疾人士,佢訴說以往求職時遭僱主針對佢嘅學歷同工作經歷,入職後亦拒絕分配佢更多職責。阿狄就話,即使現况唔理想都毋須悲觀,希望大家做好本分互相支持,「香港定能再次偉大」。

上 / 下一篇新聞