【明報專訊】錯過咗跳繩港隊喺巴黎奧運表演嘅大家,大年初一要留意喇,事關兩名曾喺巴黎鐵塔前獻技嘅港隊,當晚會聯同22名隊友喺新春花車巡遊重現巴黎奧運招式「過隧道」。港隊代表李俊明話,當晚會將花式跳繩融入繞繩及翻騰元素,希望擺脫大眾認為跳繩沉悶嘅固有形象。同場亦會有本地舞團Chestroll Dance Crew表演,當中舞團總監黃晉洋曾與歌手姜濤合作。
另一名同樣喺巴黎奧運表演過嘅港隊代表何卓錡,就會展示舞蹈交互繩(Fusion Double Dutch),呢種係糅合街舞及跳繩嘅新派跳繩項目。去年曾參加匯演嘅佢希望今年演出會更「熱血」,將巴黎奧運經驗及技巧帶到尖沙嘴街頭,等市民旅客了解跳繩表演都可極具觀賞價值,仲應承大家一定傾力演出。
在韓奪冠 25舞者「花船」上場
至於首次參加新春匯演嘅舞團Chestroll Dance Crew嘅表演會以水為題,並會表演舊年奪得韓國HARU Competition冠軍嘅舞技,以肢體動作合組「花船」。曾與姜濤及陳凱詠等歌手合作嘅黃晉洋話,新春匯演以花車為一大特色,所以特別自製「花船」上場,寓意25名成員踏上舞台演出嘅旅途。