【明報專訊】智能手機幾乎人人都用,但對長者嚟講使用時都會遇上困難。社會創新及創業發展基金資助非政府機構喺全港18區推行「友智識」,12間機構在全港設立40個定時定點嘅社區支援點,為60歲或以上長者,特別係居住喺舊區和公共房屋嘅獨老和雙老長者,提供數碼培訓同技術支援,預計逾10萬人受惠。數字辦話,有關機構會重點培訓長者使用「智方便」、醫健通、康體通等日常生活用得上嘅流動應用程式(App),並灌輸網絡安全知識。
政府新聞網訪問正使用服務嘅長者,其中馮先生最近一兩年先轉用智能手機,佢話想學嘅嘢有好多,但要慢慢學;鍾太就認為數碼培訓課程內容實用,話學會搭巴士前先查閱路程同時間,及等車時間。
數字辦高級管理參議主任陳秀婧稱,支援點通常設喺長者易達、常去或人流較多嘅地方,例如社區中心、區議員辦事處、社區客廳和長者中心,機構可向長者介紹合適嘅流動應用程式,如提供即時通訊、娛樂或電子點餐服務程式。
政府喺2024/25年度預算案宣布,社會創新及創業發展基金喺未來3年,分批撥款1億元資助非政府機構喺全港推行「友智識」。