港聞

港聞二

【Emily】料因貼身褲行山 葉劉髀生瘡要放膿 籲大家勤洗運動衫 話醫生指塞毛孔易致菌

【明報專訊】行政會議召集人、新民黨主席葉劉淑儀不時都上載郊遊同做運動嘅相,都見佢著瑜伽褲,點知日前因生咗一粒膿瘡要入院做小手術,葉太以過來人身分話,奉勸經常運動同行山者,穿貼身衣物運動後必須勤加梳洗,避免積聚細菌導致發炎。葉太同Emily講,雖然係小手術,都使咗幾千蚊,不過佢話日後都會繼續做運動。

做小手術使咗幾千蚊

葉太喺facebook以「我打敗仗了」為題,講述呢次經歷。佢話前日朝早本身諗住落區派揮春,點知一起身發現右邊大髀生咗一粒膿瘡,紅腫之餘都有啲痛。佢引述醫生話,可能因為自己穿較貼身運動褲行山,皮膚同衣物摩擦積聚油脂,遮住毛孔令細菌滋生,導致傷口發炎;好在醫生幫佢做小手術放膿同清理傷口之後,狀况已大為好轉,傷口亦舒服得多,不過就要食抗生素同定時用藥水洗傷口。

葉太噚晚搭夜機去瑞士,出席由世界經濟論壇主辦嘅女性政治領袖論壇(Women Political Leaders Forum),幸好傷勢無影響行程。佢帖文中就話因傷未能落區跟街坊見面致歉,並向各路好友拜個早年。

相關字詞﹕

上 / 下一篇新聞