【明報專訊】網購收件、寄件已係好多人嘅生活日常,順豐速運最近同九巴合作,繼喺巴士總站設立順豐自助櫃後,再開設24小時運作嘅客務站,除收件、領取失物,仲增設自助寄件、透過網絡即時同客戶服務對話查詢、充電等服務,首兩個客務站下周二(21日)起喺沙田市中心同美孚巴士總站運作。
開24小時 可收件寄件
順豐同九巴前年10月起喺35個巴士總站設自助櫃,連埋今次兩個客務站,總共有37個地點畀市民收速遞同巴士失物等。九巴話之前嗰35個自助櫃使用率持續上升,特別係新界嘅巴士總站,元朗、上水、荃灣、沙田及青衣嘅使用率都有九成以上,順豐就話大多數乘客會選擇放工時間取件。
至於兩個24小時客務站嘅選址,九巴話係因應沙田市中心同美孚總站都有多條路線途經,亦可善用空間,21日朝早亦會喺車站舉辦新春禮品派發活動。