港聞

港聞二

【Emily】「AI黃國」借錢呃幾十萬 靠把聲騙黃國友人 近月第二單冒議員得手

【明報專訊】騙徒無處不在,工聯會理事長黃國話有朋友早前收到「AI黃國」透過電話向佢借錢,朋友不虞有詐,先後匯款幾十萬元。黃國噚日報警,佢同Emily講,議員經常公開發言,容易被騙徒利用聲音行騙,促請警方加強以科技應對。

黃報警 促警方科技應對

黃國喺facebook話,近日有朋友突然追佢還錢,覺得莫名其妙,之後發現原來係有騙徒懷疑利用AI製作酷似黃國嘅聲音,透過電話向佢朋友借錢。黃國強調自己無借錢,對於朋友有金錢損失深感不安,已經報警,希望盡快將騙徒繩之於法。

黃國話唔清楚騙徒透過電話通話定短訊借錢,暫時亦未收到其他朋友表示中招。佢關注騙徒利用AI製作合成聲音行騙,市民唔易分辨真偽,呼籲大家提高警覺。

其實今次唔係首次有人冒認立法會議員行騙,去年底有騙徒以AI模仿勞聯議員周小松嘅聲音,誘騙一名工會理事多次轉帳,損失近5萬元。

上 / 下一篇新聞