【明報專訊】香港新聞行政人員協會及香港記者協會都有新動態。記協近年多個活動都要臨時煞停,舉例原定本周開打嘅記協盃足球賽就遭取消租場,不過記協再接再厲,噚日公布將喺情人節翌日(2月15日)假銅鑼灣富豪香港酒店舉辦籌款晚宴,邀請會員同支持記協嘅善長仁翁共享自助晚餐。
今年記協春茗嘅會員價每位800元、籌款價就每位1500元。記協話,今年會向各界募集極具人氣嘅拍賣品,為記協籌募下年經費,晚宴門票同拍賣收益全數用作支持記協運作,推動香港記者權益同新聞自由。
另一邊廂,香港新聞行政人員協會亦選出新一屆執委會成員。主席及副主席將分別由《南華早報》總編輯譚衛兒、商業電台新聞及公共事務副總監張秀雲繼續出任,新面孔執委就有香港電台中文新聞及時事總監羅詠暉及now TV新聞及財經資訊副總裁吳宜婷,其餘都係原有執委連任。