港聞

港聞二

【Emily】膝頭受過傷 堅持做運動 盧寵茂:有時會行樓梯上18樓辦公室

【明報專訊】運動可以促進身心健康,醫衛局長盧寵茂噚日出席活動時話自己好鍾意做運動,以前有參加毅行者、馬拉松甚至玩各類球類活動,即使之前膝頭哥受過傷,𠵱家仍堅持做運動。佢話醫衛局辦公室喺政府總部18樓,平時喺地下開完會,有機會都會行樓梯返辦公室,佢又透露教育局長蔡若蓮行得最多,經常每日來回行幾次,甚至會提醒番佢行樓梯。

盧寵茂噚日出席衛生署首屆「全校園健康計劃」學校分享會暨嘉許禮,佢致辭時話,世衛建議學童每日做最少60分鐘中度至強烈體能運動,但係香港上年度只有8%中小學生合格。佢話細個住7樓,「成日就咁跑上去」,𠵱家有機會都由地下行上18樓辦公室,睇文件都習慣企喺度,仲會鼓勵同事開會如果坐太耐可以企起身。

衛生署長林文健就提到,上年度超過八成小學生同九成半中學生每日蔬果攝取量唔夠,雖然有超過九成中小學生滿意家庭學校生活,但係有1.4%有心理同社交健康問題需要轉介評估。佢話全校園健康計劃參考世衛倡議嘅《健康促進學校框架》,有實證顯示可以改善師生健康,呼籲更多學校參與。

相關字詞﹕

上 / 下一篇新聞