【明報專訊】啟德體育園主場館近期開始測試，一班民建聯立法會議員日前拉隊去參觀，作為球迷嘅民建聯主席陳克勤對球場草地保養特別感興趣，不過佢同唔少球迷一樣，亦關注日後有咩球隊會嚟香港作賽，而近日盛傳來港嘅就有英超球隊曼聯同利物浦嘅「雙紅會」，令「利迷」陳克勤為之期待。
香港大球場嘅草地質素多年來為人詬病，陳克勤都話，球場草皮養護係承接高水平賽事嘅重要一環，同時會有表演活動需要搭台，可能會傷害草皮，點樣從中取得平衡，係世界各地賽場運營者最關心嘅議題之一，而啟德用嘅「即鋪即用」技術，就可以令草皮養護同使用更靈活。
話觀眾席近球場 料睇波體驗一流
陳克勤話一入到場館就被吸引，原因之一係觀眾席同賽場十分接近，相信睇波體驗一流，佢自己就希望「雙紅會」成事，睇下到時啟德體育園究竟會變成港版「晏菲路」定「奧脫福」。