【明報專訊】國史教育中心舉辦第七屆「年度中國歷史人物選舉」，今屆以「護疆守土，安國惠民」為主題揀選咗5個歷史人物，畀全港大中小學、特殊同幼稚園學校學生投票。最終漢朝名將霍去病獲得3.7萬票當選，以約3000票之微「擊敗」宋朝名臣文天祥。
458校參與 5人物選出
選舉喺上年11月舉行，有458間學校參與，共約12.2萬人投票。選舉要求參加者了解5個歷史人物生平同事迹，投選最有特別歷史意義嘅人物，希望學生從中了解歷史人物對國家同社會文化嘅貢獻，提升學習國史興趣，培養對國家民族認同等。
霍去病係西漢名將、軍事家，善於騎馬射箭，18歲被任命為剽姚校尉（勇猛嘅將令），參與多場戰事帶功而回，深得漢武帝喜愛，24歲時因病早逝。其餘4個歷史人物包括文天祥、唐朝名將郭子儀、明朝名將戚繼光同清朝名臣曾國藩。
