【明報專訊】位於新界東北邊陲嘅紅花嶺郊野公園早前已開放畀公眾使用，公園內有一個有百幾年歷史嘅鉛礦洞，漁護署同土木工程拓展署合作，用咗一年幾時間活化礦洞，包括灌漿加固岩洞天花，同埋為結構不穩嘅岩柱建造混凝土扶壁，仲用仿真岩石覆蓋，令礦洞搖身一變成為開放式博物館，並喺上月底已向公眾開放。當局會喺礦洞一帶增設解說牌、路標、涼亭同長椅等，加強遊覽體驗。
蓮麻坑鉛礦洞藏身茂林內，係紅花嶺郊野公園主要景點，沿住蓮麻坑郊遊徑拾級而上，攀上900幾級梯級就可以到達礦洞，一窺昔日香港礦業嘅面貌。
漁署：曾為港規模最大礦場
漁護署郊野公園護理主任（西北）陳浩鵬接受政府新聞網訪問話，蓮麻坑鉛礦洞係香港其中一個具重要經濟價值嘅天然礦藏，亦曾經係本地規模最大鉛礦場，主要出產方鉛礦，以及小量閃鋅礦同銀。港英政府於1925年批出採礦租約，採礦活動喺1936至1939年間最蓬勃，近2000名工人24小時日以繼夜開採。礦場喺日佔時期被日軍佔領，而戰後受國際鉛價下跌、天災及工潮等因素影響，最終喺上世紀50年代末停運。
相關字詞﹕蓮麻坑