【明報專訊】好多人搭巴士都會用App睇到站時間，亦有人去到站頭時，再望下顯示屏嘅實時到站時間，但有元朗區議員發現，區內嘅實時巴士到站顯示屏經常失靈，上個月分3次巡查區內47個巴士站，損壞嘅顯示屏比率達44.7%至53.2%，有顯示屏更壞咗超過半年。
有壞逾半年 質疑公帑運用
政府喺2016年《施政報告》提出撥款超過8000萬元，資助巴士公司喺有蓋巴士站加裝顯示屏。民建聯元朗支部巡查後，形容顯示屏嘅損壞比率好唔理想，一問之下，巴士公司回覆話訂購零件或物料需時，所以維修時間較耐，民建聯團隊就關注公帑係咪運用得宜，而運輸署當中又有冇角色。
團隊建議巴士公司設立定期巡查機制，運輸署亦應該承擔監督角色，主動審查，而巴士公司都要全面檢討故障原因，大量訂購零件同增加存貨，咁就可以縮短待修時間喇。