【明報專訊】副政務司長卓永興上任後嘅任務之一係打擊全港衛生黑點，早前佢就去咗「突擊檢查」，仲去到灣仔港灣道，著上清潔圍裙並戴上清潔手套，試用食環署嘅高速清洗盤洗街。佢試用後話，高速清洗盤嘅清潔效果好明顯，形容地下嘅磚頭「洗咗之後新嘅一樣」。
卓永興噚日喺facebook發文，話當日示範用洗街盤嘅清潔工芬姐開動洗街盤一陣後，灰黑地磚就回復到原來嘅紅色及黃色，連路邊石壆都變番原來嘅石色，再用水冲去污垢殘餘後，路面變成新嘅一樣。
食環署長吳文傑話，洗街盤已經喺各區採用，去垢效果顯著，會按街道行人流量同潔淨程度等因素，制定使用洗街盤深層清潔嘅優次同密度。
卓永興喺聖誕假期後亦先後走訪廟街、大埔墟四里、灣仔巴路士街等衛生黑點，佢話推行「政府打擊衛生黑點計劃」兩年幾後，經改善嘅環境衛生得以保持，街道清潔亦更勝從前；並囑咐食環署用心清潔街道，讓市民開開心心過年。