【明報專訊】中文大學前校長沈祖堯近日從新加坡返港，去咗明愛醫院同醫護分享佢喺獅城嘅所見所聞。除咗講起當地醫學教學，佢仲大談「星洲覓食記」，話當地嘅螄蚶叻沙同胡椒蟹係佢心頭好，不過令佢最念念不忘嘅仍然係香港嘅燒鵝！佢話當地以前只有燒鴨供應，好彩近年政策改變，放寬外地進口鵝類，先有得一解「相思之苦」。佢又透露希望退休之後「落葉歸根」。
話診斷不可假手AI 憂學生太依賴
沈祖堯𠵱家出任新加坡南洋理工大學李光前醫學院院長，佢近日返咗香港，出席醫管局九龍西醫院聯網「Chill Talk」活動分享；佢提到𠵱家學生可以用人工智能（AI）協助解答唔同症狀、用藥問題，擔心學生過分倚重AI，會了解唔到臨牀情况。佢話AI好似飛機副駕駛員，醫生要識利用AI提供嘅資訊，但問症同診斷唔可以假手於AI，重複同機械式嘅工作先可以用。
沈祖堯亦分享咗管理團隊心得，佢以經典管理書籍《從A到A+》（Good to Great）中「先找對的人」概念解釋，話要建立好團隊，重點係選擇出色嘅人加入，而且要心胸廣闊，有容才雅量。佢話好似巴士司機咁，每個站都要揀好嘅乘客上車，去到終站就挑選更優秀嘅人成為團隊繼任領袖。