【明報專訊】麥當勞喺1975年進駐香港，噚日推出一系列活動及優惠慶祝「香港麥當勞」成立50周年，聽日元旦，市民可以免費搭船渡維港，其中一艘船係麥當勞主題天星小輪。同日全港50個地點限時擺放麥當勞叔叔長櫈，包括喺海港城海運大廈頂層觀景台、山頂、淺水灣，以及多間麥當勞餐廳，詳細地點同開放時間就要睇麥當勞嘅手機應用程式。
1‧1全日供應早餐
仲有McGriddles
市民可以去搵麥當勞叔叔打卡自拍之餘，仲可以掃描長櫈上嘅QR Code收集印章，最快儲齊印章嘅50名參加者，明年365日可以免費食巨無霸套餐𠻹。
香港首間麥當勞位於銅鑼灣百德新街，時至今日有260間分店。麥當勞噚日舉辦大型生日發布會，請嚟曾拍攝多個麥當勞廣告嘅軟硬天師——葛民輝同林海峰擔任嘉賓，仲有麥當勞樂園嘅經典人物出席，包括麥當勞叔叔、小飛飛、漢堡神偷同滑嘟嘟。
另外，元旦日亦會提供全日早餐，仲有之前掀起搶購潮嘅「McGriddles」全日早餐，唔知到時會唔會又大排長龍呢？
香港麥當勞行政總裁黎韋詩話，麥當勞50年來喺不同範疇創新，包括1990年代推動無煙食肆、開創24小時營業餐廳等，未來會繼續與港人同行。