【明報專訊】臨近年尾就會有樂壇頒獎禮,而天文台日前都透過facebook發布「2024年度天文台頒獎典禮」,回顧過去一年嘅天氣大事,當中揀咗4件今年香港嘅天氣大事,作為「我最唔係呀嘛大事」,包括喺5月發生嘅「將軍澳暴雨」、9月發生嘅「維港水龍捲」、11月出現4個風,同埋截至上周四,2024年係自1884年以嚟最熱嘅一年。
天文台:2024創4最熱紀錄
天文台喺片段提到,截至上周四全年平均氣溫達24.8℃,比正常仲要高出1.3度,而4月同10月份嘅平均氣溫直頭破晒紀錄,且今年仲創出4個最熱紀錄,除咗最熱嘅4月同10月,仲有最熱夏至同最熱中秋。天文台仲改編咗4首廣東歌嘅歌名作為呢4件天氣大事嘅代號,包括《濕玻璃》、《捲渡眾生》、《小心碰颱》同埋Hot Hot OK?,唔知大家估唔估到來自邊幾首歌呢。
推電子年曆 涵觀星資料
另外,為迎接2025年,天文台準備咗電子年曆供市民下載。電子年曆內包括有農曆、傳統節氣同月相、四季星圖、世界各地城市時區、行星觀測、日出日落等資料,可以記低幾時有流星雨,到時就可以為觀星做足準備喇。