【明報專訊】政府連續3年財政年度財赤，現任財爺陳茂波噚日話，「本港經濟根基厚、市場韌性強，正在變局中開新格局、穩步前行」。不過，前財爺曾俊華噚日喺社交媒體評時政，話𠵱家好多人預期明年利率會繼續跌，但最後可能反而會加息去遏抑到時標高嘅通脹，「咁樓市大冧係咪又會重臨呢？」曾俊華話佢之前從2019/20年度起估算到今個財政年度呢6個財年內，總共有5年出現千億財赤，至於可以點樣扭轉，佢無再講，但佢提醒「大家喺迎接2025年嘅時候，都要有面對風高浪急嘅準備」。
話特朗普神經刀 盼中美轉機
曾俊華話，全世界密切留意美國候任總統就任後世界局勢會有乜嘢變化，話特朗普係一個冇任何政治意識形態嘅神經刀人物，做事冇乜章法可言，所以好難估計佢會做咩。佢話中美嘅爭拗，會唔會喺某方面有得交易，就會有戲劇性嘅轉機呢？
中環包影院陪孫過聖誕
世界多變，離開政府嘅曾俊華少理，呢個聖誕節喺香港同家人朋友度過，話喺外國讀書嘅孫女趁假期返咗嚟香港，佢一家人喺中環一間戲院包咗間小影院，朋友帶埋佢哋嘅仔女，佢就帶咗幾個孫仔孫女，一齊睇動畫片Moana 2，話故事勵志，大家都睇得開心。