【明報專訊】大家去行山，一定踏足過漁護署鋪設嘅山徑，但大家有無諗過可以出一分力，共同建設山徑？漁護署嘅「香港郊野公園」社交媒體專頁，噚日就公開召喚有氣力嘅山友，幫手喺聖誕節期間搬運山徑物料上大帽山，用嚟維修麥理浩徑。
專頁呼喚有力氣山友幫忙，由聖誕日（25日）到下月11日期間，行山經過鉛鑛坳上大帽山時，將物料由鉛鑛坳搬上去標距柱M138附近，路段大概要上行320米，拎物料處同搬完放低位置都會有指示，而要拎嘅物料唔算好重，每袋約一兩公斤，呢啲物料可以畀郊野公園嘅師傅用嚟修復山徑。
睇番專頁上嘅短片介紹，用嚟建山徑嘅物料，主要係木塊、碎石及泥，師傅會用嚟砌梯級同改善山徑排水。專頁話如果大家幫到手就真係唔該晒，仲提醒山徑大家都有份，叫大家行山時記得「行正路，護步道」。