【明報專訊】運輸署噚日推出「拍牌易」網上普通車輛登記號碼拍賣平台，市民只要預先註冊成為用戶，日後唔使直接去拍賣場地，透過電腦或流動裝置就可以競投普通車牌號碼。首場網上拍賣預計下年2月舉行，運輸署話初期只會喺網上拍賣約50個車牌號碼，詳情下月下旬公布。署方話，會喺檢視情况後逐步增加每場拍賣嘅車牌號碼數量，以確保平台運作暢順。
特殊自訂號碼續現場競投
運輸署提醒，市民要以具數碼簽署功能嘅「智方便+」或有效電子證書同電郵地址註冊，完成身分驗證，就可以成為「拍牌易」用戶；已交1000元按金預留車牌號碼嘅申請人，同樣要先註冊成為「拍牌易」用戶並參與網上競投。「拍牌易」預計每月會舉行兩場網上拍賣，每次拍賣為期5日，由首日中午開始至第五日中午結束，唔接受支票或現金付款。
至於以「HK」或「XX」為字首嘅車牌號碼、特殊車牌號碼同自訂車牌號碼，就會沿用現場舉牌競投方式拍賣。
