【明報專訊】聽日就係聖誕節，但喺鐵窗內嘅在囚者未能同親友共度佳節，都會大學校長林群聲喺聖誕前夕寄出400張心意卡畀在囚學生，每張都親自簽名，送上聖誕同新年祝福。卡上亦印咗勉勵字句：「迎接2025年，願未來每一天充滿無限可能，在您的學習路上，有都大陪伴左右，給予全力的支持與鼓勵！」
校方話不時收囚友心意卡
都大話，在囚學生不時會寫信，或喺佳節期間向林群聲寄心意卡，有人會分享學習進展，並表達對大學嘅感謝同送上關懷，而林群聲覺得好感動，於是舊年起亦寄心意卡畀在囚學生。
今年林群聲寄出嘅400張心意卡之中，有110張係寄畀立德學院嘅學生。都大話，舊年成立嘅立德學院為在囚學生提供一年全日制應用教育文憑課程，部分首屆畢業生決定今年9月起繼續進修，入讀都大為佢哋度身訂做嘅通識教育副學士課程。校方話今個學期過去呢幾個月派出導師走入羅湖懲教所、白沙灣懲教所同壁屋監獄，面對面同在囚學生上堂，希望師生有更多互動同實時交流。