【明報專訊】副文體旅局長劉震噚日話，舉辦嘅盛事可能有瑕疵，但希望市民盡量用欣賞角度包容盛事舉辦者；又話香港郵輪業恢復至新冠疫情前水平約七成，形容復蘇進度理想。
劉震噚日出席「九龍東可持續高質量發展研討會」，呼籲各界努力思考點樣善用九龍東硬件時，提及籌備盛事係一個好花心機嘅過程，每一項盛事背後都有血有汗，話每個盛事舉辦者都希望幫香港帶來更多機會，為市民提供更多精彩節目，而願意籌劃盛事，「無論佢哋嘅項目係可能有啲瑕疵，甚至有啲地方做得唔好，希望我哋嘅市民盡量用欣賞角度包容佢哋，咁先可以招來更多活動舉辦者，為我哋一齊舉辦更多盛事，令我哋嘅盛事經濟得以全面展開」。
話郵輪業復蘇至疫前七成
劉震又話，啟德郵輪碼頭當初設計係為咗令大量旅客快速通關，再去其他地方觀光，所以碼頭嘅商業空間只係滿足旅客基本需求，而非購物，理解社會期望善用郵輪碼頭，政府已經正在努力。佢話，亞洲郵輪業復蘇至新冠疫情前水平最快為約八成，香港郵輪業復蘇至約七成，因此復蘇進度理想，預計今年接待33萬人次郵輪旅客，比上年多五成。