【明報專訊】「我數三聲！三，二，一！」相信唔少人都聽過父母咁講，最近有調查發現，小學生最唔鍾意就係父母講呢一句，有超過71%人揀，其次係「到底要我講幾多次！」、「駁嘴你就最叻！」至於最鍾意聽到父母講嘅3句說話，依次係「加油！」、「盡咗力就得喇！」同「好叻仔／女！」
和富社區服務網絡今年4至6月訪問1226名小四至小六學生，團隊先透過焦點小組討論，設計出21句鍾意聽同24句唔鍾意聽嘅說話，畀受訪小學生選擇。
逾半想聽「考得咁好帶你去迪士尼」
其他小學生最唔鍾意聽到父母嘅說話，仲有「我以後唔會再理你，你鍾意點就點！」、「對唔住有咩用！」、「好嘢唔見你學，衰嘢你就學到十足十！」至於最鍾意聽嘅仲有「我愛你！」、「失敗唔緊要，下次再努力！」、「爸爸媽媽相信你做到！」等。
團隊仲問咗受訪小學生想聽到但從未聽過父母講嘅話，超過一半揀咗「考得咁好，等爸爸媽媽帶你去迪士尼玩！」，其次係「第時大個咗，遇到咩困難都可以返屋企！」、「爸爸媽媽尊重你嘅諗法！」
團隊提醒父母遇上仔女唔聽話，帶有情緒嘅責罵及批評往往更難改善孩子嘅行為，舉例唔好講「未做晒功課無得玩」，而可以試下講「你快啲做好功課，就唔阻住你玩」。
