【明報專訊】大熊貓盈盈生咗一對龍鳳胎後，海洋公園特登喺Instagram開設嘅專頁，幾乎每日都會上傳大熊貓一家嘅生活片段。園方噚日放咗一段龍鳳胎「家姐」嘅片，片中見家姐個pat pat同一對後腳仔不停咁郁，又不停擺尾，尾巴向上翹起。唔少網民留言大讚家姐好可愛、畀心心眼表情，話好期待去見佢哋。
海洋公園噚日喺Ig專頁pandahk_official發布嘅影片，見家姐上半身同個頭匿咗喺保暖被度，露出嘅部分可以睇到佢身形脹卜卜，身體不停郁，左邊後腳不時踢撐，尾仔一時扭左、一時扭右、一時向上翹。對比番上個禮拜三（21日）嘅片，其白色毛髮長咗濃密咗。
專頁前日上傳咗幾張盈盈嘅相，話係佢嘅「新手媽媽練習日記」；園方預備咗一個沾上咗孖B氣味嘅特製公仔畀盈盈，目的係等BB返去盈盈身邊之前，佢可以持續接觸到仔女嘅氣味，維持親子聯繫，仲可以畀護理團隊觀察同評估佢接觸有氣味公仔嘅行為。