【明報專訊】騙徒手法層出不窮，近日就有人冒認全國人大常委李慧琼（Starry）發出ＷhatsApp短訊，以親戚急需借錢為由索取銀行戶口資料，選委界吳傑莊（Johnny）都收到。Starry同Emily講，唔少人包括議員都收到冒認佢嘅短訊，情况「好離譜」，已經報警。
吳即時提醒本尊報警
繼早前有人冒認民政專員向區議員發短訊，李慧琼近日亦成為受害者，畀人冒認發出詐騙短訊。吳傑莊喺facebook貼出同名為「李慧琼」仲用埋李慧琼相片做頭像嘅帳戶對話，「李慧琼」首先話嗰個電話係「私下工作號碼」，然後問候Johnny「宜家忙唔忙啊」，隨後話鋒一轉表示有親戚要借錢，但唔方便直接轉帳，希望Johnny協助過數，請佢「發個你的卡號給我」。身為「民間反詐騙大聯盟」發起人嘅Johnny當然無上當，仲即時提醒Starry。
Starry隨即喺facebook澄清無發過呢類短訊，呼籲大家提高警覺。佢同Emily話無辦法估計幾多人收到詐騙短訊，不過警方高度重視事件，希望執法部門盡快將騙徒繩之於法。