​​

港聞

港聞二

【Emily】港大經管畢業生舉牌反「猶太復國主義」

【明報專訊】港大經管學院噚日舉行畢業禮,下午第一節典禮完結後,有畢業生喺百周年校園李兆基會議中心大會堂外,舉起反對「猶太復國主義」嘅紙牌,上面印有以色列國旗及納粹主義符號。根據港大學生會校園電視上載社交平台嘅影片,呢個畢業生至少舉牌及叫口號超過一分鐘,其後有港大職員要求佢收起紙牌及停止叫口號。

以哈衝突至今超過9個月,包括美國在內多國大學生先後發起支持巴勒斯坦人嘅聲援活動,今次舉牌嘅港大學生在場高呼,話首宗恐怖襲擊係由以色列猶太復國主義恐怖組織發起,策劃1946年大衛王酒店爆炸,所以以方自衛反擊之說唔成立等等。呢個畢業生事後向港大學生會校園電視話,自己係經管學生,另主修歷史、副修政治及公共行政,希望透過自己所學為國際事件發聲,又認為港大作為香港最國際化嘅大學,應鼓勵學生關注及了解國際大事,所以喺畢業禮抗議。

相關字詞﹕

上 / 下一篇新聞