港聞

港聞二

【Emily】校友捐千萬 起樓梯駁旺角東站 男拔爭取15年終動工

【明報專訊】九龍直資名校拔萃男書院位處旺角小山丘上,如果由旺角上去,一係行長樓梯,或者繞道亞皆老街方向行大斜路上去,大熱天時或落雨都幾辛苦。校方一直爭取建捷徑,由旺角東港鐵站直接駁上校園,由校友斥資1060萬元興建,呢項工程由2009年提出,足足搞咗15年,終獲港鐵及8個政府部門「開綠燈」,校方噚日喺校內舉行動土儀式。

8部門港鐵「開綠燈」 田北辰盼續「利人不損己」

男拔校友、實政圓桌立法會議員田北辰做主禮嘉賓,因為佢多年來有份幫母校奔走爭取。佢話車站同校舍只係毗鄰,中間有一個山坡,佢哋2009年提出建小路連接,由校友籌款支持,而小徑所在嘅山坡,上半屬男拔管理、下半屬港鐵範圍,校友幾經游說,港鐵終於同意開路,但條件係建築及安全等圖則要經港鐵審批。田二少話唔好睇小呢32米、60幾級嘅樓梯仔,要驚動8個部門,包括地政署、運輸署、土力處、教育局等,最後終可動工。

田二少話今次係校友出錢為學生服務,形容係「利人不損己」之舉,希望各部門今後都可抱持呢個原則,幫社會解決問題。

呢條小徑只供學校師生使用。田二少話,以往好多家長早上開車送仔,搞到車龍塞到落亞皆老街,如果建好呢條捷徑,學生搭東鐵返學就好方便,仲話𠵱家東鐵都過海,港島學生坐幾個站就返到學校,可減少塞車。

上 / 下一篇新聞