港聞

港聞二

【Emily】服裝設計賽 虛擬模特兒演繹得獎作

【明報專訊】科技日新月異,連行catwalk嘅模特兒都可以係虛擬。香港高等教育科技學院(THEi)同ConnectAR近日合作搞咗個「數碼旗袍及民族服裝創意設計大賽」,請咗77間學校超過400名小學、中學同大專生齊齊用AR(擴增實境)技術設計旗袍同民族服裝。上星期五(5日)舉行頒獎典禮時亦用番AR演繹中小學組嘅得獎作品,由虛擬模特兒著住虛擬旗袍行catwalk,結合藝術、文化同科技,至於大專組嘅作品就請番真人模特兒現場演繹。

唔同組別嘅冠軍作品各有特色,小學組冠軍聖公會馬鞍山主風小學採用咗裕固族嘅圖騰、蓮花等設計咗一套彩色民族服裝。中學組聖公會何明華會督中學嘅民族服裝就以雷電為設計元素,希望傳遞守護自然信息,得獎同學話靈感來自有一日見到行雷,令佢都「靈光一閃」。

大專組THEi同學作品嘅靈感就嚟自水火交融,特別加入創新花紋同圖案,希望令大家覺得旗袍都可以好潮。活動由中華煤氣支持舉辦。

相關字詞﹕

上 / 下一篇新聞