港聞

港聞二

【Emily】76年前機票$2200 太古檔案館珍藏舊香江

【明報專訊】香港早期嘅機票要幾錢?1989年半山豪宅嘅售樓書有咩特別?太古歷史檔案中心可以畀到答案。呢間喺鰂魚涌太古煉糖廠舊址嘅檔案館於2021年建成,係香港少數管理公司歷史檔案嘅檔案館。館內有早年嘅國泰機票、太古售樓書等珍貴資料,共計1200件檔案。

飛行手冊要求空姐「令旅程變有趣」

太古邀請Emily參觀檔案中心,中心內有唔少上世紀40年代至90年代嘅實物藏品,最吸引眼球莫過於一張可搵到最早年嘅國泰航空機票。呢張機票係1948年由香港前往悉尼,票上信息全部手寫,價格2200元。太古歷史檔案部總監施清補充話,當年普通工人一個月人工不過60元,就算經理級都只得400元。

施清又話,雖然機票上冇寫飛行時間,但同年代嘅貨運廣告,介紹當年澳洲生蠔直飛香港酒店需32個鐘頭,由此可估計當年需時都唔短。當年對於機組人員要求好高,飛行手冊中就明確要求空姐需「令旅程變得有趣」,仲要每幾個鐘派發一次寫有溫度、飛行高度、現時位置等信息嘅信息紙,供乘客傳閱。

1976年太古城678呎售18萬

施清又展示一本1989年太古地產半山嘅樓盤售樓書,成本書採用立體設計,可逐頁翻閱樓盤不同層次及房間嘅設計,配有白天同夜晚嘅景觀參考。另一1976年太古城價目表就顯示678呎連天台單位售價181,500元,可見香港房價多年來飛升。

施清話,成立檔案館不止為永久保存公司歷史,亦希望幫到學界同公衆人士蒐集資料。現時公衆可以團體形式電郵太古預約參觀。

相關字詞﹕

上 / 下一篇新聞