港聞

港聞二

【Emily】自傳提細個軼事 袁國勇憶小學有女仔追

【明報專訊】港大微生物學系講座教授袁國勇出自傳《袁國勇自傳:顯微鏡下觀穹蒼》,除咗有佢從醫經歷同對科學嘅諗法,Emily留意到教授喺書中提及細個軼事,如小學時被女同學追,同埋對太太嘅綿綿情意。

袁教授喺自傳憶述,小學時老師成日同佢阿媽八卦,話有一個女同學成日家政堂後送蛋糕、朱古力同餅乾畀佢,六年級時女同學更喺農曆新年到訪「見家長」,但當時得10歲11歲、自言較遲進入青春期嘅袁國勇,就理解唔到女仔心意。事隔6年,女方突然再聯絡佢,當時中六嘅「皇仁仔」袁國勇同對方去咗睇戲,又去咗皇仁書院嘅聖誕舞會。不過呢段霧水情緣最終無下文,袁國勇話可能自己未夠成熟或吸引,唔係女方杯茶。

袁國勇書中又大讚太座,話就算一日過得幾差都好,太座都會時刻惦記住自己、等自己返屋企。教授話,就算全世界都唔在乎,太太總會有興趣聽自己所思所想所為,同埋會勇於指出自己嘅錯處,形容「無咗佢,我唔會成為一個更好嘅人」。

相關字詞﹕

上 / 下一篇新聞