港聞

港聞二

【Emily】利東社區空間停運 羅健熙:改網上運作

【明報專訊】民主黨主席羅健熙自2021年起,於鴨脷洲利東商場開設「利東社區空間」做地區服務,不過業主以舖位需用作議員辦事處或社區用途為由拒絕續租,佢被迫於周六起停運。羅健熙同Emily表示,服務居民多年,告別難免不捨,「好似心血白費」,但暫時無計劃另覓地方,相信與街坊維繫關係有很多方法。

羅健熙辭任南區區議員後喺利東商場開舖服務居民,搞過疫苗接種、旅行團等活動。佢話當初簽訂租約時仍為區議員,不久後已辭任,業主因為佢並非議員或關愛隊而唔肯續租,「大概都知咩事」,所以無特別追問。

自負盈虧做地區服務,羅健熙話經營唔容易,慨嘆收支開始平衡、剛上軌道便告結束,感到可惜同勞累;停運在即,會將電器、家俬送畀有需要街坊或捐出。羅健熙自2011年喺利東邨做區議員,佢相信因為個人身分,喺區內租舖會有困難,暫無計劃再開舖,「利東社區空間」會改為網上運作,佢認為即使無實體空間仍能與街坊維繫關係。

上 / 下一篇新聞