港聞

港聞二

【Emily】民建聯辦中法建交展 舊地圖述歷史

【明報專訊】香港政界近期興搞「二軌外交」或民間外交,民建聯就趁今年中法建交60周年,喺灣仔中環中心搞為期約一個月嘅中法建交歷史展。副主席周浩鼎(Holden)話會展出超過80件展品,包括拿破崙四世嘅古典音樂盒、北京同巴黎歷史地圖、兩國歷史圖片等,部分由收藏家譚兆璋借出。展覽由今個周六(6日)到8月4日,政務司長陳國基會做開幕主禮,法國駐港總領事館同外交部駐港公署都有代表出席開幕禮。

Holden話,中法交流可數到清朝,喺康熙年間法國傳教士嚟到中國,幫助清廷製作地圖,兩國關係都開展得幾好咁話。展覽又會趁今年巴黎奧運,展出2008年北京奧運嘅圖片,溫故知新。

Holden又話,法國作為第一個同中國建交嘅西方國家,兩國關係一直對中國同西方關係有一定引領作用。至於有傳民建聯可能組團訪問法國,Holden無特別透露今年外訪地點,佢話仲籌劃緊今年外訪行程,強調「任何選擇都唔排除去了解同探索嘅可能」。

相關字詞﹕

上 / 下一篇新聞