港聞

港聞二

【Emily】盧寵茂土壤生育論惹議員炮轟

【明報專訊】立法會噚日辯論無約束力動議,建議政府加強輔助生育服務,今屆議事堂罕有現火花。醫務衛生局長盧寵茂強調高齡生育風險高,要避免政策鼓勵市民延遲生育,「婦女生殖能力會隨年齡增長直線下降,呢個唔係淨係種子問題,亦係土壤問題」。提出議案嘅民建聯林琳聞言情緒激動,「原來因為我嘅土壤唔好,所以我生唔到仔」,直斥盧寵茂說法打擊女性,批評政府僅提倡「有仔趁嫩生」。

盧稱生殖力非僅種子問題 林琳:打擊女性

多名議員發言時促請改善輔助生育政策,包括公立醫院不應僅為40歲以下女性提供輔助生育服務、應延長雪卵期限到使用者55歲。新民黨主席葉劉淑儀話,對年紀大嘅人,生育對佢哋而言十分寶貴,「『有仔趁嫩生』對好多職業女性係諷刺,我本人係39歲先至生一個細路哥,亦用咗生殖科技」。葉太又指盧寵茂致力禁煙,但提高生育率同樣重要,「邊樣更符合公眾利益?我希望(醫務)衛生局反省吓」。

盧寵茂總結發言時,重申鼓勵市民喺「最佳育齡期」及早生育,「我希望無不孕問題嘅夫婦,唔好以為可以藉住輔助生育幫助,而錯過最佳育齡期」。「我個人係以身作則,亦都身體力行……我鼓勵年輕人必須做好人生規劃,特別喺家庭方面,唔好將來後悔。有仔女係上天畀我哋好大嘅恩賜。」佢表示公營醫療資源有限,只有10名相關專科醫生,若擴闊輔助生育服務對象,結果會減少健康嬰兒出世機會。佢又話會同民青局商討,協助青年尋找合適對象及早生育,「內地做好多嘢,喺公園、公共地方做一啲媒人嘅工作」。

去年以41之齡懷孕嘅林琳回應時頗激動,「原來因為我嘅土壤唔好,所以我生唔到仔。局長你今日咁樣講,我相信對所有就算冇生育問題嘅女性,都係一個好大嘅打擊……我相信你係話畀全香港女人聽,都係唔好生仔啦,咁鬼危險」。佢認為遲婚為本港現實問題,政府應扶助有心生育市民,「唔係個個好似局長你咁,金童玉女廿幾歲讀書、結婚、生仔一鑊過㗎!」議案最終獲一致支持通過。

上 / 下一篇新聞