港聞

港聞二

【Emily】海園保育基金 無人機×AI數馬蹄蟹

【明報專訊】今日係國際馬蹄蟹日,海洋公園保育基金一直都做緊本地馬蹄蟹嘅保育工作,亦都與時並進運用新科技提高馬蹄蟹種群普查嘅成效。保育基金最近就聯同中大機械與自動化工程學系同城大化學系展開跨學科研究,首次運用無人機系統,喺本地馬蹄蟹重要繁育地嘅下白泥泥灘蒐集野外數據,長遠希望建立同訓練AI演算法偵測同識別馬蹄蟹,去評估瀕危馬蹄蟹數量嘅變化趨勢,及時制定相應嘅保育措施。

減棲息地干擾 擴普查範圍

保育基金話,應用無人機系統同AI技術普查,除咗更準確統計馬蹄蟹數量,仲減低調查人員喺泥灘行走時對棲息地嘅干擾。調查人員亦可以同步操作多部無人機,擴大調查點數目,覆蓋沿海岸嘅紅樹林等較難抵達嘅位置。

研究團隊喺下白泥泥灘首次以無人機系統蒐集數據,先以目測普查方法為泥灘嘅馬蹄蟹放置標記,畀無人機喺空中以唔同高度拍攝被標註嘅馬蹄蟹,再將圖像或錄像轉化畀AI系統,辨識物種喺自然環境入面嘅唔同形態。

團隊計劃每月做最少兩次野外數據蒐集,又計劃擴展數據蒐集範圍去到其他本地馬蹄蟹棲息地,進一步建立馬蹄蟹數據庫以支援AI演算法學習。

上 / 下一篇新聞