港聞

港聞二

【Emily】田北辰「飄移」批垃圾徵費 梁君彥喊停

【明報專訊】立法會噚日舉行特首答問會,「新質生產力」係討論主題之一。實政圓桌田北辰發言時話綠色技術亦係「新質生產力」,趁機批評政府未做好回收,政府煞停垃圾徵費,實在諷刺。立法會主席梁君彥就打斷佢發言,認為離題,「你已經飄移到唔知去咗邊,所以希望大家遵守會議規則」。

談新質生產力扯到廚餘回收

田北辰提問時,先提及「新質生產力」係包括綠色技術,再關注本港回收配套,「我覺得好諷刺,就係我哋一邊講緊新質生產力,但老老實實,另一方面政府就連垃圾分類、廚餘回收都仲未做好」。佢又問當局會唔會喺所有公屋設立廚餘處理系統「廚餘再生俠」。

田北辰發言約兩分鐘後,梁君彥就出言阻止,話佢離題,田亦無繼續發問。特首李家超最終都有回應,話認同發展綠色經濟,重申推動環保、改善回收配套係國家同香港嘅政策。Emily睇番李家超舊年話過,如果有個別議員喺答問會提出議題以外嘅問題,佢都會答。

相關字詞﹕

上 / 下一篇新聞