港聞

港聞二

【Emily】愛國教育小組辦吉祥物標誌設計比賽

【明報專訊】「愛國主義教育工作小組」上月底首次開會,討論全方位推展愛國教育,噚日身兼全國人大常委嘅工作小組組長李慧琼就宣布,小組將以「愛國愛港愛社區」做主題,舉辦吉祥物創作及標誌設計比賽,已向中小學同大專院校發出邀請函,獲選設計會用作75周年國慶或愛國活動。

上述比賽噚日起接受報名,7月15日截止。比賽設小學組、中學組同大專組,參賽者可參加多於一個比賽類別,每個類別只可交一份參賽作品。比賽結果會喺9月至10月公布,兩個比賽類別下,每組設冠、亞、季軍各一名同優異獎一名,仲有「最積極參與學校獎」。得獎者將會獲贈證書,冠、亞、季軍嘅獎品係香港故宮文化博物館嘅年票。

李慧琼話比賽係自願參與,過去政府同教育局舉辦嘅比賽都有好多人參加,有信心今次活動都一樣。至於成本,佢話活動由政府新聞處籌辦,係政府開支,相信唔係太多錢。

身兼憲法和基本法推廣督導委員會主席嘅政務司長陳國基話,今次吉祥物創作及標誌設計比賽係輕鬆有趣嘅愛國主義教育活動,希望透過比賽,畀愛國主義教育更好走遍校園,植根下一代心中。

相關字詞﹕李慧琼 愛國主義教育工作小組

上 / 下一篇新聞