港聞

港聞二

【Emily】2019年曾傳媒前口角 議員鹽田區考察 謝偉俊何君堯合照

【明報專訊】立法會「北部都會區發展事宜小組委員會」噚日到深圳鹽田區考察,到訪多個旅遊景點,包括中英街、大小梅沙、鹽港夜市等。選委界謝偉俊就話樂見深圳發展多個旅遊新亮點,但同時擔憂香港旅遊乏善足陳。

多名北都小組委員會成員噚日北上深圳考察。一行人除咗去到多個當地傳統旅遊點,亦參觀咗近年開發嘅新景點,例如位處深圳梧桐山嘅「森林客廳」,裏面設有咖啡廳等,360度落地大玻璃睇晒背山面海靚景,一眾議員都好興奮咁坐喺玻璃窗前打卡。其中謝偉俊喺facebook上載與選委界何君堯嘅合照。睇番2019年反修例運動期間,何君堯曾喺七一衝擊立法會事件後指罵民主派議員,又形容佢哋係「契弟」,謝偉俊睇唔過眼,喺傳媒面前同何君堯口角,何更用英文喝罵「你可以走開,離開香港」,未知事隔多年後,佢哋係咪已經冰釋前嫌呢?

試乘觀光無人機 研發商有意來港發展

考察團亦喺大梅沙試乘「觀光無人機」,民建聯葛珮帆話飛行過程穩定,噪音唔大,不過由於風勢較大,所以只可以體驗垂直升降,佢又引述研發商話有興趣來港發展。

上 / 下一篇新聞