港聞

港聞二

【Emily】屋邨商場空置率2.9% 深水埗區逾5%最高

【明報專訊】房委會轄下多個公共屋邨商場近日「吉舖」增加,房屋局長何永賢噚日書面回應立法會九龍西議員鄭泳舜質詢,話截至3月底,過去一年全港屋邨商場整體空置率2.93%,18區中深水埗最高,達逾5%;而深水埗7個屋邨商場,麗翠商場空置率達15%屬最高。

房局:近年多商場落成 5年增296舖

不過,房屋局亦強調,近年唔少新商場喺多區落成,過去5年新落成商場有15個,新增店舖亦有296間;房屋署會採取靈活租賃策略,喺技術可行情况下,考慮將商舖改作其他合適行業,務求提高出租率,同埋提供適切和多元化購物及服務選擇。

Emily噚日去咗麗翠商場行一轉,個場其實幾細,見到有六七個「吉舖」招租。有街坊話因為商場位置唔顯眼,附近亦有好多食肆同商舖選擇,以致人流較少;亦有商戶嘆生意難做,之前新冠疫情期間有租金寬免,疫後無咗寬免但生意無起色,經營更難,希望房署喺商場當眼位置加設「水牌」,令多啲客人嚟光顧。

鄭泳舜亦同Emily話,屋邨商舖空置情况惡化係全港問題;佢又舉例南山商場雖然空置率係零,但街坊話其實啲舖頭好多時都無開門做生意。鄭泳舜促請房委會研究提供優惠租金「搶商戶」,同埋喺招租方面加強宣傳,希望可以改善商舖空置情况。

上 / 下一篇新聞